撰文：《東方新地》娛樂組●採訪、攝影：攝影組●設計：美術組
當年天王劉德華秘密收埋女友朱麗倩，結婚生女亦唔公開，可以話係娛樂圈經典，時移勢易，藝人拍拖結婚生仔鍾意開心share，不過都有例外例子周柏豪。
忽然又有咗！周柏豪太太出院時低調蒙面
之前仲話努力造人中的周柏豪，19年尾被踢爆秘密產女，才開心上載三張湊女親密照，不過，休息五日出院的周太，依然未有同老公柏豪企埋一齊影相，罕有現身繼續保持低調，當日下午12時半柏豪率先一個人步出港安醫院，跟在場傳媒打招呼，之後便一直企在七人車旁，此時，老婆Stephanie由抱住B女的柏豪媽陪同步出醫院，B女用毛巾包到冚，周太亦戴上口罩及冷帽，著住厚衛衣和大褸擋風，一直低下頭行上車，柏豪受訪時未有多講老婆，不過一提湊女便眉開眼笑，坦言已幫囡囡換過三次尿片，全程掩不住升任爸爸的興奮！